CM-in MZP Students' Aid Fund a tlangzarh

12th December, 2025: Mizo Zirlai Pawl (MZP) chuan khawsak harsa zirlaite chhawmdawlna tura an duan Students' Aid Fund chu December 10, Nilaini zan khan Woodland Hills-ah chief minister Lalduhoma'n a tlangzarh.

MZP Students’ Aid Fund (SAF) hi Mizo zirlai, an zirnaa harsatna an tawh vanga zir chhunzawm thei lo leh a mamawhte chhawmdawlna tura ruahman a ni a; tlangzarhna hmunah hian mi eng emaw zatin pawisa an thawh nghal a, Rs 2,15,235 a tling.

MZP SAF hi chi hnih - grant (a thlawna chhawmdawlna pek) leh interest free loan (a pung awm loa pûk) tur siam a ni a; SAF Management Committee-in a ṭul angin diltute hnenah an pe ṭhin dawn. Zirlai ni mek zawng zawng a huam rualin, thingtlang lam zirlai leh pianphunga harsatna neite a kâwk bik deuh a, chhawmdawlna sum hman dan turah kaihhruaina leh khuahkhirhna mumal tak siam a ni.

CM Lalduhoma chuan, MZP-in zirlai, a bikin thingtlang leh hmun kilkhâwr zawka mi, ṭanpui ngaite ṭanpuina tur SAF an buatsaih chu zirlai pawl an nihna nen inhmuh a tih thu a sawi a, "Ṭanpui ngaite kan inṭanpui tawn hian khawtlang leh ram nuam kan siam a, ringtu kan nihna zawna kan tih tur a ni bawk. Mi dangte ṭanpui thei dinhmuna kan ding a nih chuan ui loin i pe ṭhin ang u," tiin mipui a sáwm.

MZP SAF-in zirlai harsa zawng zawng a ṭanpui vek seng dawn lo tih sawiin Lalduhoma chuan, "CM Relief Fund-ah pawh hming dang vuah a dil nawn duh hialte an awm a, a mamawhtute hnenah ngei a thlen theih nan guidelines fel tak siam a ni leh pek chhuah a nih tur hi a ṭha hle a ni,” a ti.

Chief Minister chuan, harsa taka lehkha zirte chu chhel taka bei zel turin a chah a, "Retheihna leh harsatnate hi min chher hriamtu, mi puitling leh hman tlak ni tura min din chhuaktu an lo ni ṭhin. Kan mi hlawhtling tak tak, central service lo paltlangtute kha nuamsa taka lehkha zir an váng hle a, inhlawh chawpin, retheihna leh hrehawmna tam tak paltlangin an bei a, an chhelin an tum a ruh hle ṭhin a ni" a ti a; tumruhna leh chhelna vawng tlat turin zirlaite a chah.

Minister of state B Lalchhanzova pawhin thu sawiin, MZP-in zirlai harsate chhawmdawlna tur an ngaihtuah chhuak chuan a tihphûr thu a sawi a, "Mi dangte tana luang chhuak duh leh ṭanpuina pe duh tam tak an awm a, ṭanpui dan kawng hre lo tam takte SAF kaltlang hian an rawn luan chhuah ngei ka beisei a ni” a ti.

MZP President Dr C Lalremruata chuan, MZP pisaah zirlai harsa tak tak ṭanpuina dila lut tam tak an awm tawh thu sawiin, "Pawlin kan sum neih a tam loh avangin ṭanpuina dila rawn lutte an mamawh angin kan ṭanpui thei ṭhin lo a, zau zawka Mizo zirlaite kan ṭanpui theih nan SAF hi kan siam a ni” a ti a; SAF-a sum lutte chu MZP ta ni loin, zirlai harsate hman tur a nih thu a sawi.

 https://www.vanglaini.org/tualchhung/162639?date=2025-12-12