12 December, 2025 : Mizo Zirlai Pawl chuan zirlai khawsak harsa, zirna chhunzawm thei loten an zir chhunzawm zel theihna atana tanpuina tur a duan – Students’ Aid Fund a siam thar a. Nilaini zan khan chief minister Lalduhoma’n a tlangzarh.
MZP Gen. Hqrs. president Dr C Lalremruata chuan zirlai pawl an nih angin, MZP Pisapui-ah zirlai harsa tanpuina dila rawn tlan lut tam tak an lo tanpui tawh thin a, pawl sum neih a tam loh avangin, tanpuina dila rawn lutte an beisei leh an mamawh angin an lo tanpui thei thin loa, zau zawka Mizo zirlaite an mamawhna anga an tanpui theihna tur Students’ Aid Fund hi an siam ta tih a sawi a ni.
Chief minister chuan MZP-in zirlai, a bikin thingtlang leh hmun kilkhawr zawk ami, puih ngaite puihna tur a ngaihtuah chhuak chu lawmawm tih sawiin, zirlai pawl an nih anga zirlaite tana thaa hma a la chu a inhmeh tih a sawi.
He fund kaltlang hian zirlai harsa zawng zawng a tanpui vek seng dawn loa, CM Relief Fund-ah pawh hming dang vuaha dil nawn duh hial an awm, tiin, dik taka a mamawhtute hnenah ngei a thlen theihnana guidelines fel tak siam a ni leh pekchhuah a nih tur chu a tha hle tih chief minister hian a sawi a ni.
Students’ Aid Fund :
- SAF Management Committee-in tul leh tha a tih angin dilna lut thlifimin a ngaihtuah thin dawn.
- SAF guidelines tarlan angin, Mizo zirlai, zirna ina inziaklut zawng zawng chauh huapzo tur a nih rualin, thingtlang lam zirlai (rural students), pianphunga harsatna nei (differently-abled students) tan a ni.
- Fund hman danah inkhuahkhirhna dan (strict ethical standards) siamin, document diklo hmanga he fund hmuh tum an awm chuan dan angin an chungah hma lak a ni dawn a ni.
https://theaizawlpost.org/amp/mzp-in-zirlai-harsa-puihna-tur-students-aid-fund-a-siam-thar/
