MZP-in zirlai harsate tana ban theih tura a duan Students’ Aid Fund CM-in a tlangzarh

Dec 12, 2025: Nilaini zan khan MZP Gen. Hqrs. chuan Mizo zirlai, an zirna kawnga harsatna avanga zir zawm theilo leh a mamawhte tana ban theih tur Students’ Aid Fund an tlangzarh a, hun hmanpuitu chief minister Lalduhoma chuan MZP-in zirlai, a bikin hmun kilkhawr leh thingtlang mi, ṭanpui ngaite ṭanpuina tur an ngaihtuah chhuak chu a lawmawm tih a sawi.

Woodland Hills, Zonuam-a hun hmanah hian chief minister chuan MZP chu zirlai pawl a nih ang ngeia zirlaite tan hmalakna ṭha tak a nei chu a inhmeh tih a sawi a, “Ṭanpui ngaite kan inṭanpui tawn hian khawtlang leh ram nuam kan siam a, ringtu kan nihna zawna kan tih tur a ni bawk. Midangte ṭanpui thei dinhmuna kan ding a nih chuan ui loin i pe ṭhin ang u,” a ti.

Hetih rual hian fund kaltlangin zirlai harsa zawng zawngte ṭanpui vek sen a ni dawn lo tih pawh chief minister chuan a sawi a, dik takin a mamawhtute hnenah ngei a thlen theih nan guidelines fel tak siam a ni leh pek chhuah a nih tur chu a ṭha tih thu a sawi. Hei bakah harsa taka lehkha zir mek zawng zawngte chu chhel taka bei turin a chah a, retheihna leh harsatnate chu mihring chher hriamtu, mi puitling leh hmantlak ni tura dinchhuaktu a ni fo ṭhin a ti.

Supply Minister B.Lalchhanzova pawhin midangte tana luangchhuak duh leh ṭanpuina pe duh tam tak an awm thu leh a kawng hrelo tam tak an awm tih a sawi a, SAF kaltlangin an luan chhuah a beisei thu a sawi bawk.

He SAF tlangzarhna hun hi MZP Vice President, Sanghmingthanga kaihhruaina a hun hman niin, sum tuak nghal niin, pawisa fai `2,15,235 hmuh a ni.

https://zothlifim.com/chanchinthar/2025/12/mzp-in-zirlai-harsate-tana-ban-theih-tura-a-duan-students-aid-fund-cm-in-a-tlangzarh/